गरियाबंद जिला में देवारी के रंग, हाट-बाजार सजे, बहनी मन के सुआ गीत ले गूंजत हे गांव-गांव

रिपोर्ट – योगेश्वर साहू

गरियाबंद। गरियाबंद जिला के राजिम, पाण्डुका, फिंगेश्वर, छुरा में ए बखत देवारी तिहार के पूरा रंग देखे बर मिलत हे। हाट-बाजार रिकम-रिकम के पटाखा, दिया-बाती अऊ मिठाई ले सजे हावे। बहनी मन घर-घर जाके सुआ नाचत हे, सुआ दोहा गावत हे।

काली सुरती तिहार आय। गांव में आदिवासी भाई मन गौरा-गौरी के पूजा-अर्चना करके घर-घर करसा निकालथे। रात भर गौरा-गौरी के पूजा होथे, नाच-गाना होथे।

काली इतवार के सुरती तिहार, दीपावली मनाए जाही। मगलवार के गोवर्धन पूजा होही अऊ बुधवार के गांव-गांव में मड़ई-मेला के कार्यक्रम होही। छत्तीसगढ़ में हमर लोक संस्कृति के अलगेच पहचान हावे, तेखरे से तो हमर छत्तीसगढ़िया मन के मान हावे।

देवारी में सुआ दोहा गीत के परम्परा गांव में आजो जीवित हे। बेमौसम बारिश होय के कारण ए साल तिहार थोकिन फिका रही। किसान मन धान लुआई नइ करे हे, खेत में धान अटके पड़े हे।

छत्तीसगढ़ प्रदेश के सगला लोगन मन ला दीपावली, गोवर्धन पूजा, भाई दूज, मातर परब के बुलंद टाइम्स न्यूज के तरफ ले गाड़ा-गाड़ा बधाई अऊ हार्दिक शुभकामना।