छुरा-विजयपुर गांव में बड़े उछाह ले मनाय गिस भगवान विश्वकर्मा जयंती

बुलंद टाइम्स न्यूज/योगेश्वर साहू

छुरा/ घटारानी। गांव विजयपुर में सृष्टि के रचयिता भगवान विश्वकर्मा जी के जयंती बड़े धूमधाम ले मनाय गिस। ए बेरा ट्रैक्टर संघ द्वारा भव्य आयोजन करे गिस।

फजर ले ही गांव में उछाह के माहौल रिहिस। ट्रैक्टर संघ वाले मन मंच-माइक लगाके भगवान विश्वकर्मा जी के मूर्ति स्थापना करके पूजा-पाठ चालू करिन। गांव भर के किसान भाई, महतारी-बहिनी, दाई-ददा, लईका-सियान अउ नवजवान मन जुरियाके कार्यक्रम ल सफल बनाइन।

संघ के अध्यक्ष सेवक ठाकुर बताइन कि सबो मिलके गांव के खुशहाली अउ तरक्की बर भगवान ले मंगल कामना करे हें। पूजा के बाद प्रसाद वितरण घलो होइस।

ए मौका म संघ के सचिव अजय कुमार नागेश, अशोक ठाकुर, चिंताराम सिन्हा, राजू सिन्हा, अमितेश ठाकुर, महेश्वर नागेश अउ शैलेंद्र नेताम समेत भारी संख्या म गांव वाले मन उपस्थित रिहिन।