फुलझर में चार हफ्ता के एतवारी तिहार के बाद धूमधाम से सम्पन्न होइस खार पूजा…

बुलंद टाइम्स न्यूज/योगेश्वर साहू

छुरा /घटारानी। गांव में चार हफ्ता ले चलत आंवत एतवारी तिहार के आज समापन होइस। एखर बाद आज खार पूजा के कथा के आयोजन करे गीस, जेमां गांव के जम्मो सियान, पंच, सरपंच अऊ ग्रामीण मन बड़े उत्साह ले शामिल होइन।

बतादन कि खार पूजा छत्तीसगढ़ के पुराना परम्परा ए, जेमां गांव के देवी-देवता के पूजा करके गांव में सुख-समृद्धि अऊ खेत में फसल अच्छा होए के कामना करे जाथे। एही मान्यता के संग आज फुलझर में विधि-विधान ले पूजा-पाठ सम्पन्न होइस।

ए अवसर में ग्रामीण फुलझर अध्यक्ष श्री डिहु राम साहू, सचिव श्री रूपेश कुमार ध्रुव, उपाध्यक्ष श्री ईश्वर यादव, कोषाध्यक्ष श्री दिनेश ध्रुव, सरपंच श्री संतोष दिवान, हरिश्चंद्र तारक, भागीराम दिवान, सुमिरन गिरी गोस्वामी, धनेश ध्रुव, फगेश्वर साहू, जहुर दिवान, पुरानिक ध्रुव, सोमन सेन, देवेन्द्र महाराज सहित सैकड़ों ग्रामीण मन उपस्थित रहिन।

गांव के सियान मन बताइन कि एतवारी तिहार हमर किसान मन के आस्था के तिहार ए। खार पूजा के बाद अब कल गांव में गणेश पूजा होही अऊ बाल बांधे जाही, जेखर बाद नवा फसल के तैयारी शुरू होही।